لوحات

لوحات

رعد المهنا

1..

عيش وحدك وأطبع بوجه الجفوك

أثر من شوگك إذا طال الهجر

وأگطع هروش الأسف وإنسه النسوك

وحنّي بيبان الامل ،طش النذر

وأفرش بروحك ضوه ال ضنّوا طفوك

وأشرب فراگ التودهم كل فجر

وشّل ما بعد بالعين ظَل ماء

وصفَت من شح بصيص الشوف ظلماء

يَسِّر الـ ما إله بالكون ظِل ماء

لغز مكنون وأسراره خفيه

2..

تربّع في خفوگي الفيه الك باني قصور

حلاة العرش من تطبع تفاصيلك

أرتّل في حروف اسمك ترانيم الطيور

واعيش أجواء صمتي وي تراتيلك

يحلالك علوّ الأنف وي هذا الغرور

وتستاهل تكون القبله وأمشيلك

كُبر چانون دلّالــــي دوالك

وطِشْ نذور من يحصل دوه الك

فقط مرّه أعتبر گلبي دوله لك

وأحس آنه الشعب وتحير بيه

3..

بيّه من الخجل والخوف سلطان

تودني وترد تربكني الهواجس

واظل أرعى المحنَّه بطيبة إنسان

مثل دجله وتحن ليهه النوارس

وارسمك حلم وردي بعين فنان

واطگ شوگ بكثر مابيَّه واهس

ظِنون المَس دليلك لو هواجس

وهِن فعلن هواجس لو هوى جس

إختلف بينه الموادد لو هواجس

لو خوف وخجل وظنون هيه

4..

شِفت حزنچ طبع بخدود بغداد

وبچت كل المدن ع الناصريه

ياشبعاد روحچ لَگِش وأوروك

يا أول حرف بالسومريه

هاي ولايتي غيره وغصن زيتون

مِن إطـــــّگ تردّد بيت أبوذيه

أسن حُبچ شريعه وأقره بيهه

بسبب گاعچ نبوّه وأقره بيهه

أظل بيهه آنه ألهج وأقره بيهه

عناوين شكثر بالناصريه

5..

ما بين ذاك الشوگ والحب القديم

تغفه روحي بالصور والذكريات

وغاصت عيوني بودادك وانته غيم

وغزلت الغربه خيوط معوسجات

ململم سنين العمر ومتاني ديم

يبلل عيون العليه مشوحبات

تهل مرّه دمع عيني مرادم

ومرّه سموم تاذيني مره ديم

المصايب تردم بروحي مرادم

تهزهزني وتخض دولاب بيه